Poesie

A NICOLA MIRAGLIA

Nu busto ‘e bronzo a ccentro d’’o salone,

‘e n’omme ‘mpapijonne e ffaccia austèra;

‘sti vierze so’ pe’ cchi nun sape bbuono

chello ca st’omme ha fatto e cchello ch’era.

Era ‘o prodotto ‘e n’ebbreca passata,

asprigno comm’’a terra d’’e lucane;

‘ncopp’ a nu piezz’’e marmo sta appujato,

‘nzegno ‘e ll’affetto ‘e nuje napulitane.

Nuje ca cient’anne fa rischiajeme gruosso,

‘e perdere pe’ ssempe orgoglio e gloria;

vinte meliune ‘a sotto,steve ‘nfuosso,

‘stu Banco nuosto ricco ‘e tanta storia.

‘Stu Banco addò mappate ‘e puverielle,

truvavano sustegne e ddignità,

ca già cient’anne primm’’e Masaniello,

sanava ‘e cchiaje cchiù ggrosse ‘e ‘sta città.

‘nzomma llà nce vuleva nu remmerio,

llà nce vuleva overo n’omme onesto;

Miraglia ‘mmiezz’ a ttante era ‘o cchiù sserio,

e ffuje nu ragg’’e sole ‘int’’a tempesta.

E ‘ncopp’’e ccarte soje,gnosta e ssurore,

quanno s’ausava penna e calamaje;

cu’’na passiona carreca d’ammore,

tanto facette ca ‘o resuscitaje.

Ogge ca tanti ccose so’ cagnate,

e ttanti ccose cagnarranno ancora;

nun se pò scancellà tutt’’o ppassato,

nun se pò scarpesà chi ha dato ‘o còre!

4/7/1999 ANTONIO RUGGIERO

SO’ ARRIVATE ‘E PIEMONTESE

So’ arrivate ‘e piemontese,

sì, però senza cavalle;

so’ arrivate cu’ ll’ intesa,

‘e cuntarce quatte palle.

Chelli ppalle ca ‘na vòta,

fujeno sulo scard’’e vrite,

scamazzanno sott’’a rota

chella bbell’ Italia aunita.

Chillu suonno ‘e fratellanza,

nu miraggio, ‘na chimèra,

ca rignette e rregn’’a panza

a cchi azzuppa ‘e che mmanèra.

So’ arrivate ‘e piemontese,

so’ arrivate ‘e bbella posta;

ciente, mille mane stese,

‘ncopp’ a cchesta Banca nosta.*

E scusate si me ‘ncrippo,

si ve dico ‘a verità…

‘O ttabbacco ‘int’ a ‘na pippa,

sulo fummo nce pò ddà.

Sulo fummo, che squallore,

sott’ a cchistu cielo blu;

cinche secule ‘e splennore…

E ‘ntrasatto, niente cchiù.

26/9/2000  ANTONIO RUGGIERO